இலக்கிய நினைவஞ்சலி

தெணியான்: ஈழ இலக்கியத்தின் மூத்த தூணும் ஒடுக்கப்பட்டவர்களின் தீராத குரலும்

கந்தையா நடேசன் (1942–2022) நினைவில்…

✍ கிருஸ்ணா அம்பலவாணர் | மே 22 நினைவு நாள்

இன்றைய இளம்தலைமுறை அவர் பற்றி அறிந்துகொள்ள வேண்டும் என்பதற்காக தெணியான் அவர்களின் நினைவு சுமந்து — இவ் நினைவுக் குறிப்பு அவர் மறைந்தபோது தாய்நாடு இதழுக்கு 23.05.2022 அன்று எழுதியது. காலத்தின் தேவை கருதி இன்று அவரின் நினைவு நாளில் மீளிடுக்கை செய்கின்றேன்.

தெணியான் (கந்தையா நடேசன்) — 1942–2022 · வல்வெட்டித்துறை பொலிகண்டி

கந்தையா நடேசன் என்னும் இயற்பெயருடன், இலக்கிய ஊடக உலகில் தெணியான் என்ற புகழ் பெற்ற ஈழத்தின் மூத்த இலக்கிய ஆளுமை, அத்தகைய மாமனிதர் 2022 மே 22ஆம் திகதி தமது 80ஆவது வயதில் வடமராட்சி கரவெட்டி கரணவாய் இல்லத்தில் மறைந்தார்.

1942 ஜனவரி 6ஆம் திகதி வல்வெட்டித்துறை பொலிகண்டியில் கந்தையா – சின்னம்மா தம்பதியினருக்கு பிறந்த இவர், தமிழ் இலக்கிய வரலாற்றில் முற்போக்கு எழுத்தாளர்களின் வரிசையில் ஒரு தவிர்க்க முடியாத பெயராக என்றென்றும் நிலைத்துவிட்டார்.

இவர் 1964 ஆம் ஆண்டு விவேகி சஞ்சிகையில் 'பிணைப்பு' என்ற சிறுகதையுடன் எழுத ஆரம்பித்து, ஏறக்குறைய 120 இற்கும் மேற்பட்ட சிறுகதைகளை எழுதியிருக்கின்றார். தொடர்ந்து நாவல், குறுநாவல், வானொலி நாடகங்களுடன் நிருத்தன் என்னும் புனைபெயரில் கவிதைகளையும் எழுதியுள்ளார். ஈழத்துத் தமிழ் இலக்கியமும் அதன் தலைமையும் அதன் தவறுகளும் என்னும் தலைப்பில் 1977 ஏப்ரல் தொடக்கம் 1978 வரை மல்லிகை இதழில் ஒரு விவாதக் கட்டுரையை எழுதினார். தினக்குரல் பத்திரிகையில் நெஞ்சில் பதிந்துள்ள நினைவுகளில் பேராசிரியர் கா. சிவத்தம்பி என்ற 19 அத்தியாயங்கள் கொண்ட தொடரை எழுதியதுடன் "சிதறல்கள்", "கானலில் நீர்" முதலான நாவல்களையும் எழுதியுள்ளார்.

தெணியான் வெறும் எழுத்தாளர் மட்டுமல்லர்; அவர் ஒரு ஆசிரியர், சமூகப் போராளி, மார்க்சிய சிந்தனையாளர், சாதிய ஒடுக்குமுறைக்கு எதிரான தீவிரக் குரல் மற்றும் தமிழ் மக்களின் வாழ்வியலை ஆழமாக ஆவணப்படுத்திய வரலாற்றுப் பதிவாளர். கரவெட்டி தேவரையாளி இந்துக் கல்லூரியில் மாணவராகப் பயின்று, பின்னர் அதே பாடசாலையில் ஆசிரியராகவும், தலைமை ஆசிரியராகவும், கல்வித் துறைப் பொறுப்பாளராகவும் பணியாற்றி 2002இல் ஓய்வு பெற்றார். அவரது வாழ்க்கை முழுவதும் கல்வி, இலக்கியம், சமூக நீதி ஆகியவை ஒன்றோடொன்று பின்னிப் பிணைந்திருந்தன.

இலக்கியப் பங்களிப்பு — யதார்த்தத்தின் தீவிரக் குரல்

1964 இல் விவேகி இதழில் 'பிணைப்பு' என்ற சிறுகதையின் வாயிலாக இலக்கிய உலகில் அடியெடுத்து வைத்த தெணியான், அன்றிலிருந்து அரை நூற்றாண்டுக்கும் மேலாக அயராது படைத்தார். 150க்கும் மேற்பட்ட சிறுகதைகள், 14 நாவல்கள், குறுநாவல்கள், கவிதைகள், வானொலி நாடகங்கள், கட்டுரைகள் எனப் பல்வேறு தளங்களில் தமிழ் இலக்கியத்தை செழுமைப்படுத்தினார்.

அவரது முக்கியப் படைப்புகளான கழுகுகள், மரக்கொக்கு, காத்திருப்பு, கானலில் மான், குடிமைகள், சொத்து, ஒடுக்கப்பட்டவர்கள் போன்றவை ஈழத்து மக்களின் வாழ்வியல், சாதிய ஒடுக்குமுறை, போர் வேதனை, அகதி வாழ்க்கை ஆகியவற்றை யதார்த்தவாத – இயல்புவாத அழகியலுடன் கூர்மையாகப் படம் பிடித்தன. கே. டானியல்க்குப் பின்னர் ஈழ இலக்கியத்தில் ஒடுக்கப்பட்ட மக்களின் சாதியப் பிரச்சினையை தீவிரமாகவும், தொடர்ச்சியாகவும் எழுதிய முன்னோடியாகத் திகழ்ந்தார். மரக்கொக்கு நாவல் சிங்கள மொழியிலும் மொழிபெயர்க்கப்பட்டு பரவலான கவனத்தைப் பெற்றது.

அவரது எழுத்துக்கள் சமூகத்தின் அடித்தளத்தில் நிகழும் ஒடுக்குமுறைக்கு எதிரான சக்திவாய்ந்த குரலாக ஒலித்தன.

இலங்கை அரசின் சாகித்தியரத்னா விருது (2013), வடக்கு மாகாண ஆளுநர் விருது (2008), இலங்கை இந்து கலாசார அமைச்சின் கலாபூஷணம் விருது (2003), கு. சின்னப்பபாரதி விருது, தேசிய கலை இலக்கியப் பேரவைப் பரிசுகள், கொடகே விருது உள்ளிட்ட பல உயரிய விருதுகளைப் பெற்ற அவரது பணி, தமிழ் இலக்கிய உலகின் உயரிய அங்கீகாரத்தைப் பெற்றது.

போர்ச்சூழலில் தெணியான்

ஈழ விடுதலைப் போராட்டத்தின் இருண்ட காலகட்டத்தில் தெணியான் தமது எழுத்தின் ஊடாக தமிழ் மக்களின் வேதனையையும், எதிர்பார்ப்பையும், போராட்ட உணர்வையும் ஆழமாகப் பதிவு செய்தார். அவரது வானொலி நாடகங்கள் தமிழ் தேசிய உணர்வை வலுப்படுத்தின. முற்போக்கு எழுத்தாளர் சங்கத்தின் யாழ்ப்பாணக் கிளைச் செயலாளராகவும், சிறுபான்மைத் தமிழர் மகாசபையின் ஊடாகவும் சாதிய ஒடுக்குமுறைக்கு எதிராக தொடர்ந்து போராடினார்.

அவரது எழுத்து போரின் கொடுமைகளை மட்டும் சித்தரிக்கவில்லை; ஒடுக்கப்பட்ட மக்களின் விடுதலை, சமூக நீதி, மானுட விழுமியங்கள் ஆகியவற்றை முன்னிறுத்தி, இலக்கியத்தை ஒரு சமூக விடுதலை ஆயுதமாக மாற்றியது.

தெணியான் (கந்தையா நடேசன்) — 1942–2022 · வல்வெட்டித்துறை பொலிகண்டி

ஊடகம் — இலக்கியம் — முன்னுதாரணம்

தினக்குரல், மல்லிகை, ஞானம், யாழ், வீரகேசரி போன்ற இதழ்களில் தொடர்ந்து எழுதிய தெணியான், பேராசிரியர் கா. சிவத்தம்பி, டொமினிக் ஜீவா போன்றோரைப் பற்றிய நினைவுக் கட்டுரைகளையும், தன்வரலாற்று நூலான இன்னும் சொல்லாதவையையும் படைத்தார். இலக்கியத்தை வெறும் பொழுதுபோக்காக அவர் கருதவில்லை; அது மக்களின் வாழ்வை மாற்றும் சக்தி என்று ஆழமாக நம்பினார். அவரது எழுத்து இன்றும் மாணவர்களுக்கும், இளம் எழுத்தாளர்களுக்கும், சமூக ஆர்வலர்களுக்கும் என்றும் ஒரு முன்னுதாரணமாக விளங்கும்.

தெணியான் தோழரே!

உங்கள் எழுத்துக்கள் ஈழத்து மண்ணில் என்றும் மலர்ந்து கொண்டிருக்கும். ஒடுக்கப்பட்ட மக்களின் இதயங்களில் உங்கள் குரல் என்றும் எதிரொலிக்கும். போரின் தீயிலும், சாதியின் சங்கிலியிலும் சிக்கிய தமிழ் மக்களின் வலியை நீங்கள் பதிவு செய்த விதம், தலைமுறை தலைமுறையாக வழிகாட்டியாக நின்று கொண்டிருக்கும்.

ஈழத்து இலக்கிய உலகம் உங்களை என்றென்றும் தன் இதயத்தில் சுமந்து கொண்டிருக்கும். உங்கள் படைப்புகள் வழியாக நீங்கள் என்றும் உயிரோடு இருப்பீர்கள்.

தெணியான் (கந்தையா நடேசன்) — 1942–2022 · வல்வெட்டித்துறை பொலிகண்டி

கி

கிருஸ்ணா அம்பலவாணர்

ஈழத் தமிழன் · திராவிட தமிழ்த்தேசிய சிந்தனையாளன்

தெணியான் · கந்தையா நடேசன் · 1942–2022 · ஈழ இலக்கிய நினைவஞ்சலி